LAOAG CITY – Napasaran ti Cleveland Cavaliers ti nakaro a pannakaabak ita a season kalpasan a simmubbot ti dati daytoy nga inabak nga Oklahoma City Thunder (OKC) iti iskor a 134 – 114.
Arig inruar ti Oklahoma City Thunder ti gagar daytoy kalpasan ti pannakaabakda iti naudi a panagsangoda ti dua nga NBA best team iti panagleppas pay laeng ti umuna a quarter ket iggemen ti Thunder ti 17 points lamang.
Nanayonan pay daytoy iti maikadua a quarter a dimmanon iti 25 points.
Inkarigatan ti Cavs ti sumubbot iti maikatlo a quarter ngem saanna a kinabaelan ti episyente nga opensa ti best Western team.
Imbes a makakamat ket ad-adda laeng a ngimmato ti lamang ken immabot pay iti 37 points.
Iti uneg laeng ti 29 a minuto ket naaramid ni Shai Gilgeous-Alexander ti nakaiserrek ti 40 points karaman ditoy ti walo nga assists idinto a nakaaramid met ti forward ti team a ni Luguentz Dort ti 22 points iti uneg laeng ti 20 a minuto a panagay-ayamna.
