LAOAG CITY – Nasken a maisubli ti tinakaw a kuarta ti gobierno.
Daytoy ti inpetteng ti Catholic Bishops’ Conference of the Philippines (CBCP) iti inruar a pastoral letter mainaig kadagiti maanomalya a flood control projects.
Basar iti Catholic Bishops’ Conference of the Philippines, dagiti anomalya ket mangdadael iti masakbayan ti pagilian gapu ta dakkel a paset ti pundo ti gobierno ket maikabkabil laeng iti korapsion.
Inbatad ni Catholic Bishops’ Conference of the Philippines President Pablo Virgilio Cardinal David, nabayagen nga ammo ti publiko ti aw-awaganda nga “anatomy of corruption” no sadinno nga agarup 60% ti pundo dagiti proyekto ti maipagarup a maikabkabil iti komision ken kagudua laeng ti pudno a maus-usar iti aktual a konstruksion.
Kunana a daytoy ti rason no apay a naruay a proyekto ti maliplippas a palpak, substandard ken paulit-ulit laeng nga ar-aramiden ti gobierno.
Inlawlawag ti Catholic Bishops’ Conference of the Philippines a rumbeng nga agsungbat dagiti karaman ti panawagan nga isubli kadagiti umili ti pundo a tinakaw kas paset ti hustisia.
Binabalaw ti Catholic Bishops’ Conference of the Philippines iti panagraira ti kultura iti kinnapigsaan ken panagyaman uray narugit ti naggapoan ti tulong.
Segun iti simbahan, saan nga umdas a mapnek iti temporario a benepisio ken nasken nga ilaban ti nadalus a panangimaton ken pudno a nainkalintegan.
Kabayatanna, kangrunaan a nagpanawagan dagiti obispo kadagiti agtutubo nga agbalin a naridam iti social media kontra kadagiti palso nga impormasion.
