LAOAG CITY – Maragsakan ni Mrs. Janette Retamal, mangidadaulo ti Gender and Development Office iti panangisayangkat ti benchmarking dagiti pannakabagi iti Cebu City Gender and Development Federation ditoy siudad ti Laoag.
Segun kenkuana, ti panagbisita ti Cebu City Gender and Development Federation ket mangipaganetget iti panangikagumaan iti panangitandudo ti Gender Equality ken panangitag-ay para kadagiti babbai.
Inbatadna nga inkagumaan ti delegasion ti Cebu City a maammoan dagiti gannuat ditoy siudad ti Laoag nga idauloan dagiti babbai a mangpabileg iti ekonomia.
Inlawlawagna a daytoy nga aspeto ket naipamaysa kadagiti programa ken pagalagadan a mangsuporta kadagiti babbai iti panangipasdek ken panangpadakkel kadagiti negosioda a makatulong iti lokal nga ekonomia.
Mainaig iti daytoy, inpakaammo ni Retamal ti kinapateg dagiti aktibidad ti benchmarking iti panangpataud iti panagtitinnulong ken panangpaalisto iti panagrang-ay ti gender equality ken women’s empowerment.
Kabayatanna, kuna ni Retamal a nakasagana ti opisinada kangrunaanna iti lokal a gobierno ditoy siudad ti Laoag kadagiti nasao nga aktibidad tapno ad-adda pay a maiyam-ammo kadagiti bisita ti siudad iti panangipasigurado a ti environmental sustainability ken cultural preservation efforts ket mangpabileg kadagiti babbai.
