LAOAG CITY – Nagbalinen a nalawag para kadagiti koponan nga aglaban para iti NBA Finals ken magun-od ti Larry O’Brien Trophy.
Mangrugi ti panaglaban ti Boston Celtics ken Dallas Mavericks inton Hunio 6 iti TD Garden ti home court ti Boston.
Maipalagip a na-sweep ti 4-0 ti Boston ti Indiana Pacers iti Eastern Conference Finals idinto a tinambakan ti Dallas 124-103 ti Minnesota Timberwolves ken naala ti 4-1 a panangabak iti Western Conference Finals.
Daytoy ti maikdua a makastrek iti Finals ti Boston iti maudi a tallo a season kalpasan ti pannakaabak iti Golden State Warriors idi 2002 iti maikanem nga ay-ayam idinto ti Dallas ket isu ti umuna a gundaway iti Finals kalpasan a magun-od ti kampeonato idi 2011 idi abakenda ti Miami Heat.
Sumagmamano kadagiti padpadaanen dagiti basketball fans ket ti panagsango ni Dallas star Kyrie Irving iti dati a koponan daytoy ken daytoy ti umuna nga ay-ayam ni Luka Doncic iti umuna nga NBA Finals.
Iti namindua a daras a nagbinnalubal ti Dallas ken Celtics iti regular season ket agpada a nagballigi ti Celtics no sadino idi immuna ket idi Enero 22 iti iskor nga 119-110 ken idi Marso 1 iti court ti Celtics iti iskor nga 138-110.
Target me ti Boston Celtics a magun-od ti maika-18 a kampeonato tapno maartapan ti Los Angeles nga addaan ti kaadduan nga NBA Titles.
Gagem ti Dallas a maulit manen ti kampeonato idi 2011 no sadino indauloan idi ni Jayson Kidd nga isu ti headcoach ita ti Mavericks.
