LAOAG CITY – Naiget ti koordinasyon ti City Environment and Natural Resources (CENRO) ken dagiti nagduduma a barangay ditoy ciudad ti Laoag para iti pannakaipatungpal ti tree planting kangrunaan na ita a panawen ti tudtudo.
Daytoy ti inbatad ni Miss Mylene Pascual, ti mangidadaulo iti City Environment and Natural Resources ditoy ciudad ti Laoag.
Segun ken ni Pascual, saan laeng a tree planting ti maaramid no di ket masapol a dagiti maimula ket mataripato a naimbag.
Kuna na a masapol a mapadakkel a nasayaat dagiti maimula a kayo tapno masagrap metlaeng dagiti benepisyo a maipaay na para kadagiti tattao.
Kabayatanna, inpakaammo ni Pascual a manarimaan ti panangpa-eksamen da kadagiti danom a naala manipod iti Padsan River ken iti coastal barangays babaen ti panangpondo ti city government ditoy ciudad.
Inlawlawag na a gagem ti nasao nga addang ket tapno masigurado ti kalidad ti danom kadagiti nadakamat a lugar.
