LAOAG CITY – Kiniddaw ti City Environment and Natural Resources ditoy ciudad ti Laoag iti publiko nga agitugot kadagiti mausar da iti pannangan ken no uminom da tapno maliklikan ti ado a basura.
Inaramid daytoy ni Miss Mylene Pascual, ti mangidadaulo iti City Environment and Natural Resources kagiddan iti agtultuloy panagbalin a problema ti basura ditoy ciudad ti Laoag.
Inrekomendar na a sakbay a rumwar iti pagtaengan ket siguradwen nga adda ti bitbit a bukod a paginuman, bag a pagikabilan kadagiti gatangen ken pagikabilan ti bukod a basura.
Inlawlawag na a babaen iti daytoy nga addang ket makatulong a mangkissay kadagiti basura ken makainot pay dagiti tattao.
Innayon na a napateg dagitoy nga aramiden dagiti tattao tapno in-inot a masolusyunan ti kinaado ti basura a mangdadael iti aglawlaw.
