LAOAG CITY – Nagpanawagan ti City Environment and Natural Resources Office wenno CENRO a liklikan ti agpuor ita a panawen ti kalgaw.
Segun ken ni Ms. Mylene Pascual, mangidadaulo iti nasao a pangopisinaan, dagiti mapaneknekanda a naglabsing iti pagannurotan ket tiliwenda kas maiyataday iti ordinansa ti lokal a gobierno ken maiyallubog iti Republic Act No. 9003 a mangipawil daytoy a banag.
Inlawlawagna a malaksid laeng iti opisinada ket kabinnuligda pay dagiti opisial ti barangay a mangtiliw kadagiti agsalungasing iti nasao a linteg.
Mainaig iti daytoy, inbalakad ni Pascual a no adda dagiti residente ditoy siudad nga agkalikagum nga ikkaten dagiti ledda ket nasaysayaat no patpaten ken ikali dagitoy tapno maliklikan ti asok a mangpabara iti aglawlaw a mangitunda ti uram.
Innayonna nga adda ti pakaammoda kadagiti tunggal barangay ditoy siudad ti Laoag a mangdesignar ti maymaysa a lugar a pangikabilan kadagiti napagango a bulong tapno ti City Engineering Office ti mapan agkolektar tapno saanen a puoran pay.
Kabayatanna, daytoy a panawagan ket kagiddan dagiti napasamak nga uram iti kallabes ditoy siudad ti Laoag.
