LAOAG CITY – Nabwal ti dakkel a puon ti acacia iti paset ti Barangay Suyo iti ili ti Dingras a nangitunda ti pannakaserra ti sibubukel a kalsada.
Iti panagturong ti Bombo Radyo Laoag iti nasao a lugar, nagtitinnulong dagiti kameng ti DPWH, barangay officials ken dagiti residente tapno maikkat ti dakkel a puon ti kayo.
Rumrumuar a ti pannakabuwal ti puon ti acacia ket ti kanayon ti panagtudtudo ti napigsa rason a limmukneng ti daga.
Gapo iti kinadakkel ti puon ti kayo ket marigatan dagiti kameng ti DPWH a mangikkat iti daytoy, ken nagusar dagitoy ti innem a chainsaw ken adda ti pay loader a nangbunag kadagiti napisi a kaykayo.
Mainaig iti daytoy, gapo ta saan a makadallayasat dagiti motorista ket temporaryo nga aglikaw da pay laeng manipud iti dike ken sumalpot iti Barangay Bungcag wenno iti Barangay Guerrero.
Iti laksid a nabuwal ti dakkel a puon ti acacia ket awan met dagiti nairaman a pagtaengan ken saan a nadalapos dagiti waya ti kuryente a posible a nangitunda kuma ti pannakapukaw ti supaly ti elektrisidad.
Naamoan nga addan ti nasurok 100 a tawenen ti puon ti acacia ken mabuteng idi dagiti residente a mangsalingsing iti sanga na gapo ta arig na nakapalutpot a sanga ti balete.
Malaksid iti daytoy, kuna ni Barangay Chairman Amado Taylan iti nasao a barangay a basar kadagiti istorya ket arig na adda ti mangiparparit a mapukan ti puon ti acacia a saan a makitkita ti tao.
Kunana a nakita da ti pannakabwal ti kayo ken dagus da nga intawag iti PNP ken dagus da a nangrugi a nangsalingsing ngem insardeng da ken intuloy da itay bigat.
