LAOAG CITY – Inbilin ni Dr. Prospero De Vera, chairman ti Commission on Higher Education (CHED) kadagiti amin nga State Universities and Colleges iti intero a pagilyan nga agus-usar ti old calendar nga iserra dan ti semester kalpasan ti Abril 30.
Inlawlawag na a kayat na a sawen ti pammilin na ket awanen ti aramiden ken rumbeng nga isumitir dagiti agad-adal no di ket macompute lattan dagiti grado da.
Inbatad na a dagiti met unibersidad nga agus-usar ti baro a calendar ket mapalubusan da a mangiyalud-od ti semester no kasapulan ngem masapol a maysa laeng a bolan kalpasan a maibabawi ti Enhanced Community Quarantine (ECQ).
Segun ken ni De Vera, iti pannakitaripnong na iti presidente kadagiti State Universities and Colleges ket kaadoan kadagitoy ket inbaga da a saandan a pagsublien iti classroom dagiti estudyante no di ket usaren da lattan dagiti requirements nga inted da kadagiti estudyante tapno macompute da ti grado dagiti agad-adal.
Inpakaammo ni de Vera nga adda dagiti sumagmamano nga unibersidad nga agplanplano pay laeng nga agklase kalpasan ti ECQ ngem dagitoy ket dagiti adda iti Covid-19 free area.
Kabayatanna, inbaga ni de Vera a ti aramiden da agingga intono Agosto a panaglukat ti klase ket mangisayangkat da ti nalawa a training program para kadagiti faculty ti nagduduma nga State Universities and Colleges ditoy pagilyan.
Innayon na a ditoy a maisuro kadagiti maseknan ti Flexible learning ken iti panaglukat ti klase ket saanen a mausar ti dati a sistema a puro lectures iti uneg ti classroom ti maaramid.
Kuna ni de Vera a babaen ti flexible learning ket saanen a kasapulan nga inaldaw a mapan iti pagadalan dagiti estudyante gapu ta mabalin ti online classes, agiyawid da kadagiti assignments ket agaramid ti module.
