LAOAG CITY – Kinumpirmaran ti Chicago Bulls a pagretiroendan ti No.1 Jersey ti dati a Most Valuable Player (MVP)-da a ni Derrick Rose.
Ni Rose ket nagay-ayam ti naminwalo a daras iti Bulls ken ditoy a nabigbig isuna kas kaubingan nga MVP iti pakasaritaan ti National Basketball Association (NBA).
Naala ni Rose a kas No. 1 Pick iti 2008 NBA draft a nangabak met iti Rookie of the Year (ROY) ken nakaawat iti MVP award idi 2011.
Sakbay ti panangipakaammo ti Bulls, immun-una nga inbatad ni D. Rose a kayatna a makita ti jersey-na kadagiti rafters ti United Center, ti home court ti Bulls iti maysa nga aldaw.
Kalpasan a naiyakar isuna iti New York Knicks idi 2016, awan pay ti Bulls player a nakasuot iti numero uno iti jersey-da.
Inted ti Chicago daytoy kada Michael Carter-Williams ken Anthony Morrow ngem awan kadagitoy ti nangusar gapu iti kritisismo a naawat manipud kadagiti fans.
Iti intero a karera ni D. Rose, isu ket nakairekord ti 12,573 a puntos ken 3,770 nga assist iti 723 nga ay-ayam iti las-ud ti 15 a tawen.
Malaksid iti Bulls, nagay-ayam pay ni Rose iti Knicks, Detroit Pistons, Minnesota Timberwolves, Cleveland Cavaliers ken Memphis Grizzlies.
