LAOAG CITY – Linawlawagan ni Police Lt. Col. Rafael Lero, ti chief of police ditoy ciudad ti Laoag ti naidanun a reklamo ditoy Bombo Radyo babaen ti maysa a motorista.
Daytoy ket mainaig iti kaadda ti maysa nga empleado iti Laoag City Hall a maipagarop a nagna iti inner lane imbes nga iti slow moving vehicle lane a saan a naiyisoan ti naticket babaen kadagiti kameng ti pulisya.
Inbaga ni Lero a saan a mismo a dagiti kameng ti pulisya ti agisyu ti ticket gapu ta adda dagiti traffic aide a nakaduty iti lugar ken ag-supervise laeng dagiti kakadwa da.
Kuna na pay a saan pay a kumpirmado no pudno nga empleado iti Laoag City Hall ti maseknan.
Inbatad na nga iti pannakisarita na kadagiti kakadwa na a nakaduty iti lugar ken sinaludsud na no apay napasamak ti kasdiay ket saanda a diretsa a nasungbatan isut gapuna nga agimbestigar.
Innayon na a kasarita na pay ti mangidadaulo iti PNP Traffic Division tapno palagipan na dagiti traffic aide a masapol a patas ti panangipakatan da ti linteg.
Mainaig iti daytoy, inlawlawag pay ni Lero a no umuna a gundaway nga aglabsing ti maysa a motorista ket ballaagan da pay laeng basta kompleto ti dokumento na nga agmaneho.
