LAOAG CITY – Nagpannawagan a pagpatinggaen ti child labor ditoypagilian, kalpasan ti panangipamaysa ti Department of Social Welfare and Development (DSWD) iti daytoy a parikut.
Inrugi ti Department of Social Welfare and Development ti Strategic Helpdesks for Information, Education, Livelihood, and Other Developmental Interventions wenno SHIELD, maysa a programa a kontra iti child labor.
Mainaig iti daytoy, ti nadakamat a programa ket addaan ti panggep a mangpasardeng iti panagusar kadagiti ubbing wenno napilit a panagtrabaho dagiti ubbing, a pakaigapuan ti pannakaisarangda kadagiti dakes a kasasaad, pannakadadael ti salun-at ken panagdakkelda, agraman ti epektona iti edukasionda.
Segun ken ni SHIELD Against Child Labour Focal person Maribel Barcenas, karaman ditoy ti sumagmamano a komprehensibo a programa ken serbisio a manglapped iti child labor, kas iti intervention ti gobierno ken regular a panagsasarita kadagiti komunidad.
Malaksid iti daytoy, makaawat pay ti tulong babaen iti edukasion ken ekonomia dagiti nailasin wenno profiled child laborers ditoy pagilian.
Mainaig iti daytoy, kinunana a mapapigsa ti monitoring iti amin a rehion tapno mabantayan pakairamanan dagiti lokal a gobierno ken dadduma pay nga ahensia ti gobierno.
Kabayatanna, segun ken ni Barcenas, adda karbengan dagiti ubbing nga agbiag a nawaya ken natalged manipud iti aniaman a kita ti napilit a panagtrabaho, ken pagrebbengan dagiti nagannak ken ti gobierno a salakniban dagiti kalinteganda.
