LAOAG CITY – Inbatad ni Chinese President Xi Jinping ken ni Ukrainian President Volodymyr Zelenskyy a saan pulos nga aglako ti China ti armas iti Russia.
Inaramid daytoy ni Presidente Xi bayat ti panagsarita da ken ni Zelenskyiti telepono.
Nadakamat met daytoy a banag ni Zelenskyy bayat ti joint press conference da ken ni United States (US) President Joe Biden iti G7 summit idiay Italya.
Nupay kasta, saanen nga indetalye ni Zelensky no kaano da a nagsarita ken ni Presidente Xi.
Mainaig iti daytoy, mangnamnama ni Zelensky nga agtalinaed a respetado a tao ni Presidente Xi babaen ti panangtungpal na iti karina a saanto pulos nga aglako ti China ti armas iti Russia.
