LAOAG CITY – Nagpanawagan ti Chinese Embassy iti gobierno ti Pilipinas nga i-ban dagiti Philippine offshore gaming operations (POGOs) hub ditoy pagilian, no sadinno a kaaduan kadagiti nairaman ket Chinese nationals.
Segun iti Embahada, naiget a maiparit idiay China ti aniaman a kita ti panagsugal.
Innayon pay ti embahada a ti Philippine offshore gaming operations, ket makadadael iti interes ken imahe ti Pilipinas ken China kasta met iti relasion ti dua a pagilian.
Mainaig iti daytoy, kinunana a makikomunikar ti gobierno ti China kadagiti otoridad ti Pilipinas seknan kadagiti Chinese nationals a nairaman iti illegal activities ditoy pagilian.
Kinondenar da pay dagiti pammabasol kontra iti China mainaig iti isyu ti Philippine offshore gaming operations nga awan ti nakaibasaranna.
Kabayatanna, inaramid ti Chinese Embassy ti nasao a statement kas sungbat iti kallabes a raid kadagiti Philippine offshore gaming operations hubs iti probinsia ti Tarlac ken Pampanga.
