LAOAG CITY – Mangnamnama ti City Administrator ditoy ciudad ti Laoag nga adda ti maikkedeng nga aldaw a panagsarita ni dati a Mayor Michael Marcos Keon ken agdama a Mayor James Bryan Alcid.
Segun kenni Atty. Ed Von Cid, kalpasan ti eleksyon ket awan pay ti panagsarita dagitoy ngem panawen laengen ti makaibaga no mapasamak daytoy.
Inbatad na a no iti panagkapia ket patien na a saan a kasapulan gapo ta dagiti napasamak iti kallabes ket laban da laeng iti pulitika, saan kaet a personal.
Maipalagip nga inpakammo ni Cid nga inbasura ti Commission on Elections Second Division ti election protest nga inpila ni Keon kontra ken ni Alcid.
Kunana a nakailanad iti certificate of finality nga awan pulos ti naipila a motion for reconsideration babaen ken ni dati a Mayor Keon kalpasan a nag-lapse wenno nagngudon ti aldaw a naited kenkuana a pawayway nga agpila.
Innayon na a daytoy ti nagbalin pay a resulta ti saan a makaanay nga ebidensia tapno mangsuportar iti reklamo ni dati a Mayor Keon kontra ken ni Mayor Alcid.
