LAOAG CITY – Maimbitaran ti mangidadaulo iti City Engineering Office a ni Engr. Marishelle Batuac pakairamanan ti pannakabagi ti Ilocos Norte Water District ken Bureau of Fire Protection iti Sangguniang Panlungsod ditoy siudad ti Laoag inton bigat, Pebrero 18.
Daytoy ket tapno sungbatanda dagiti nagduduma a saludsod mainaig iti pannakainstolar dagiti fire hydrant ditoy siudad.
Segun ken ni Mayor James Bryan Alcid, masapul laeng nga agsungbat dagiti maseknan nangruna ket kalikagumna nga agbalin a transparent iti babaen ti administrasionna.
Inbatadna a gagem ti lokal a gobierno a maipakaammo iti publiko dagiti maipatpatungpal a proyekto.
Inlawlawagna a mangnamnama daytoy a masungbatan dagiti maseknan nga opisina ken ahensia dagiti saludsod dagiti agpanpanday linteg iti konseho.
Maipalagip a masdaaw ni Konsehal Jason Perera iti kinabassit dagiti fire hydrants a manarimaan a main-instolar ditoy siudad ti Laoag isut gapuna nga indasarna daytoy kabayatan ti regular session ti Sangguniang Panlungsod.
Kunana a basar iti obserbasionna ket adda dagiti fire hydrants nga atiddog ti tubona ken agtayag laeng ti 12 a pulgada.
Immuna iti daytoy, nangipasa ti konseho ditoy siudad ti Laoag ti gakat para iti pannakaestablisar dagiti fire hydrants iti nagduduma a paset ditoy siudad tapno adda ti asideg ken alisto a pangalaan ti suplay ti danum dagiti kameng ti Bureau of Fire Protection no adda dagiti mapasamak nga uram kalpasan kadagiti nagsasaruno a fire incidents ditoy siudad iti kallabes.
