LAOAG CITY – Balligi a naisayangkat ti Congressional Friendship Athletic Meet Season 2 Championship ita nga aldaw iti Ilocos Norte Centennial Arena.
Segun ken ni Mayor James Bryan Alcid, napintas nga adda dagiti maiyus-uswat nga sporting events tapno ad-adda a maiyasideg dagiti umili nangruna kadagiti agtutubo iti komunidad ken maiyadayo dagitoy ti dakes nga aramid.
Inbatad ni Mr. Jadewin Gudoy, napadayawan kas Most Valuable Player ita a season, saanna a ninamnama a magun-od ti nasao a balligi nangruna ket agkakalaing met dagiti padana nga umaayam iti basketball.
Inlawlawagna a masapul ti disiplina ken hardwork iti panagay-ayam iti basketball tapno magun-od ti panagballigi ti grupo.
Kuna ni Mr. Joemar Damaso a saan a mailadawan ti kinaragsakda iti agdama kalpasan ti panagkampeonda.
Mangnamnama daytoy a magun-oddanto manen ti kampeonato inton sumaruno a tawen.
Kabayatanna, nagyaman ni Mayor Ralph Medrano a babaen iti daytoy nga aktibidad ti Congressional Office nga idadauloan ni Ilocos Norte 1st District Rep. Sandro Marcos ket maipakita dagiti talento dagiti umili kadagiti nagduduma a tay-ak ti ay-ayam.
Immuna iti daytoy, nagballigi ti Team Laoag kontra iti Team Sarrat iti basketball.
