LAOAG CITY – Kalikagun ti City Government of Laoag a maaddaan ti monthly update dagiti maibilang a karaman iti economic enterprise ditoy siudad.
Segun ken ni Mayor James Bryan Alcid, karaman kadagiti economic enterprise ket ti Laoag City General Hospital ken ti Laoag City Public Market and Commercial Complex.
Inbatadna a naaddaanda ti business review ken nangipaay ti Mayor ti pagannurotan nga isu ti surotenda iti panangipaay ti report.
Inlawlawagna a kalpasan iti daytoy ket makitana met a sumursurot dagitoy no sadinno a makitana ti panagngato ti gross sales services revenue dagitoy.
Kunana a ti Laoag City General Hospital no idasig ti napastrekda idi 2024 ket ngimmato ti 44% iti tawen 2025.
Inpettengna nga ita a tawen ket kinaritna ti nasao nga ospital a maaddaan ti 20% a panagngato manen ti revenue.
Innayonna a magun-od daytoy babaen iti panangpapintas pay ti serbisio ken panangipasigurado nga adda ti makaanay nga agas.
Kabayatanna, inpasigurado ni Alcid a manarimaan ti panangiyurnosda mainaig iti isyu a maib-ibus ti suplay ti agas iti nasao nga ospital.
