LAOAG CITY – Nagkiddaw ti City Government of Laoag ti P50-M manipud iti Department of Health para iti pannakapapintas ti Laoag City General Hospital.
Segun ken ni Mayor James Bryan Alcid, malaksid iti daytoy ket nangilatangda pay ti 250 a milyon a pisos para iti renovation ti nasao nga ospital.
Nupay kasta, inlawlawagna a maiyur-uray pay laeng ti pannaka-bid-na daytoy.
Mainaig iti daytoy, kuna ni Mayor Alcid a saan laeng a ti physical structure ti papintasenda no diket ad-adda pay a pasayaatenda ti Laoag City General Hospital para iti napinpintas a serbisio medikal.
Inbatadna nga addanto payen ti naan-anay a silaw iti ruar ti Laoag City General Hospital pakairamanan ti parking space tapno awanen dagiti aggandat pay nga agtakaw ditoy.
Innayonna nga iti agdama ket matingtingiting pay laeng ti panagbalin a Laoag City Medical Center ti Laoag City General Hospital gapu ta maipangpangruna pay laeng dagiti masapul a maipatungpal.
