LAOAG CITY – Rinugianen ti City Government of Laoag a dalusan iti baba ti Gilbert Bridge a pagpuestoan ti carnival ditoy siudad ti Laoag.
Segun ken ni Mayor James Bryan Alcid, padalusannanto pay ti kaleddaan tapno maliklikan ti uram a mapasamak kas iti naglabas a tawen.
Inbatadna a narugian payen ti bidding process kadagiti interesado nga aplikante ti carnival.
Inlawlawagna nga adda ti tallo a nagprisentar a patienna a napinpintas a carnival no maidasig kadagiti naglabas a tawen.
Kunana a manamnama a no malpas ti bidding process ket mabalinton a maestablisar ti carnival iti tengnga a paset ti Enero.
Innayonna nga adda ti maestablisar a portalet wenno temporario a comfort room a maipatakder para kadagiti lokal ken bisita nga agturong iti carnival.
Maipalagip nga inrakurak ni Alcid a manarimaanen ti panagisaganada kadagiti aktibidad para iti pannakaisayangkat ti Pamulinawen Festival inton bulan ti Pebrero.
