LAOAG CITY – Kiniddaw ti City Health Office iti Sangguniang Panlungsod ditoy siudad ti Laoag ti nayon a pundo para iti Human papillomavirus vaccine.
Segun ken ni Ms. Rowena Nicolas, Nurse III ti City Health Office nga uray adda ti inpaay ti Department of Health iti kallabes a vials ti bakuna ket saan nga makaanay daytoy nangruna ket ti kalikagumda a mabakunaan ita a tawen ket dagiti agtawen ti 9 agingga iti 14 a babbai.
Inlawlawagna a malaksid kadagiti pampubliko ken pribado a pagadalan ket bumisitada kadagiti komunidad tapno maidanon daytoy a serbisio a dakkel a makatulong tapno prebentaran a maaddaan ti cervical cancer iti maysa a babai.
Mainaig iti daytoy, kuna ni Nicolas a no mabalbalin ket mangnayon ti pundo ti Sangguniang Panlungsod tapno maipaayan amin ti bakuna.
Inpakaammona nga iti kallabes ket nagatendarda ti regular session no sadinno nga inprisentarda daytoy a gagemda.
Innayonna nga adda ti maikadua pay a panagatendarda tapno ipakita dagiti dokumento a mangsuporta iti daytoy.
Mangnamnama ni Nicolas a babaen iti daytoy nga addang nga ar-aramidenda ket mapatgan ti kiddawda a pakabenepisiaran ti kaaduan nga umili.
