LAOAG CITY – Inaprobaran ti Sangguniang Panlungsod ti maysa nga ordinansa a mangipawil iti backyard slaughter wenno panagparti iti ruar ti slaughter house ditoy siudad ti Laoag.
Segun ken ni Konsehal Kiko Ang, Chairman ti Committee on Market and Slaughter House, gagem daytoy nga ordinansa nga iliklik dagiti residente ditoy siudad nga agkonsumo ti saan a nadalus a karne.
Inbatadna a babaen iti daytoy nga ordinansa ket maipasigurado a mainspeksion a naimbag nga umuna ti karne no daytoy ket natalged ken maipasigurado pay ti kinadalus iti aglawlaw a pakapartian ti dingwen.
Inlawlawagna iti bileg ti ordinansa ket maipawil dagiti agparti iti sadinoman a lugar kas iti arubayan ti pagtaengan kas nakadawyan iti dadduma nangruna kadagiti agpauraga wenno bunto-bunto.
Kunana a no adda ti residente ditoy siudad ti Laoag nga agparti ket rumbeng a maiwayat amin daytoy iti slaughter house.
Inpettengna a dagiti aglabsing ket adda ti kaibatugan a pannusa no sadinno a dua a ribu a pisos iti 1st offense, tallo a ribu a pisos iti 2nd offense idinto a lima a ribu a pisos ken pannakakumpiskar kadagiti karne iti 3rd offense.
Mainaig iti daytoy, inpakaammo ni Konsehal Ang a daytoy ket maysa a national law ken kasapulanda laeng nga i-localize babaen iti panangputarda ti ordinansa.
Innayonna a dagitoy ket para kadagiti 4 legged animals kas ti baboy, kalding ken baka.
