LAOAG CITY – In-inot a manaynayon dagiti traffic enforcers iti siudad ti Batac.
Segun ken ni Vice Mayor Albert Chua, kasapulan daytoy tapno adda ti mangiwanwan ti taray ti trapiko gapu iti in-inot met a panagadu ti lugan iti siudad nangruna kadagiti maibilang a rush hour.
Inbatadna a kasapulanda ti nayon dagitoy gapu ta adda dagiti malukatan ken maiserra a kalsada tapno maliklikan ti panagirot ti taray ti trapiko ngem adda laeng ti orasna.
Kunana nga adda dagiti mailunglungalong iti Sangguniang Panlungsod a mabalbaliwan dagiti dadduma a ruta.
Nupay kasta, inlawlawagna a saanda nga insigida nga ipatungpal daytoy no diket ipadasda pay laeng tapno makita no ania ti epektona.
Innayonna a kitaenda dagiti dumalyasat a lugan iti barangay Aglipay, Caunayan, Nalupta, Cangrunaan ken dagiti dadduma pay a kalsada nga agturong iti Mariano Marcos State University ken Hospital.
