LAOAG CITY – Pinabalbaliwan ni Mayor James Bryan Alcid ditoy siudad ti Laoag ti pakausaran dagiti pundo nga immunan a nailatang iti sabali a proyekto kas ti pundo para iti slaughter house ken walkable sidewalk.
Inbatadna a daytoy ket babaen ti maysa a resolusion nga inpasa ti Sangguniang Panlungsod iti kallabes.
Inlawlawagna a ti kangrunaan a rason ket gapu iti pannakaobserbarna a dumaanen ti Laoag City Hall ken ti saan a panagbalin a Person’s With Disability ken Senior Citizen friendly daytoy.
Gapu iti daytoy, nagdesision ni Mayor Alcid nga aramaten dagiti sumagmamano a pundo tapno mapagbalin ti ABC Building kas People’s Center.
Kunana a babaen iti daytoy ket mapagbalin nga one stop shop building a pakaipaayan ti al-alisto a serbisio ken saan a marigatan dagiti addaan ti rangkap ti bagina ken dagiti senior citizen gapu ta karaman ti pasilidad dagiti mabalinda nga aramaten tapno dumanon kadagiti pangopisinaan a pagpatulongan a saan a marigrigatan.
Inpettengna nga iti agdama ket ti City Social Welfare and Development Office ken City Health Office laeng ti addaan ti napintas a pangopisinaanna ken adda dagiti organisasion nga awan ti opisinana kas iti liga ng mga barangay nga awan ti pagturongan dagiti agkiddaw ti tulong.
Inpasingkedna a nalpasen ti program of works daytoy ken inpanamnamana a dakkel a makatulong daytoy kadagiti umili.
Innayonna a matuloy latta dagiti dadduma a programna kas ti walkable sidewalk ngem kitkitaenna laeng dagiti rumbeng a maipangpangruna.
