LAOAG CITY – Inrakurak ni Laoag City Mayor James Bryan Alcid a saan amin nga aramiden ti opisinana ket kasapulan nga ipakaammona iti legislative body.
Daytoy ti nagbalin a sungbatna kalpasan iti immun-unan a rakurak dagiti kameng ti Sangguniang Panlungsod a naipaayanda koma ti naan-anay a panawen tapno adalen ti nakaipalaon ti resolusion a mangilatang ti 20 milyon a pisos para iti sports development project partikular ti triathlon.
Segun iti Mayor, idi pay laeng napalabas a tawen a namungay daytoy nga ideya ken lima a bulan ti naiyalokar tapno mangisayangkatda ti panagsukisok ken feasibility study.
Inbatadna nga apaman a nakitada nga epektibo daytoy ket nangputardan ti resolusion.
Kunana a saanda a mangidasar ti gakat a saan a dimmalan ti umno a proseso.
Inpettengna nga awan ti agsubli manipud iti city government no diket ti napintas nga epektona daytoy ket agturong kadagiti nagduduma a negosio ditoy siudad.
Innayonna a ti maala ti city government ket business permits ken ad-adu pay nga investors.
