LAOAG CITY – Naipadanonen ti sertipiko ti pammigbig ken ni Mr. Aurelio Almazan mainaig iti pannakasayangkat ti social media application nga inaramidna.
Maipalagip a nangipasa ti maysa a resolusion ti Sangguniang Panlungsod ditoy siudad kas pammigbig ti kangrunaan a Pilipino a nakapartuat ti social media application iti pagilian.
Iti panagbitla ni Sangguniang Panlungsod member John Michael Fariñas, binigbigna ni Mr. Aurelio Almazan a tubo iti Barangay 43 Cavit ditoy siudad.
Kunana a ti nasao nga indibidual ket nakabukel ti maysa a social media application a nainaganan nga “Ayatko.”
Innayonna pay a daytoy ket maysa a dakkel a pammadayaw aglalo ket maysa nga ilokano ken tubo ditoy siudad ti nakaaramid iti daytoy.
Kabayatanna, iti babaen ti nasao a resolusion ket mangipaay ti pammigbig kas panagyaman ti konseho ken agserbi daytoy nga inspirasion iti benneg ti teknolohia.
Maipalagip nga imununan nga inpakaamo ni Almazan a ti nasao a social media application ket rumbeng kuma nga usarenda laeng nga agpamilia ngem idinto a napagdesionanna a pagbalinen nga accessible daytoy iti amin.
Basar ken ni Almazan a kas ti China, Japan ken Estados Unidos, panawenen nga adda bukod a social media application ti pagilian.
