LAOAG CITY – Irugi manen ti City Environment and Natural Resources Office (CENRO) iti pannakaipatungpal ti “Alisto Barangay Greening Program” ditoy suidad ti Laoag.
Iti babaen ti nadakamat a programa, maipaay iti lima a pulo (50) a kalamansi seedlings iti kada barangay.
Segun ken ni Ms. Mylene Pascual, mangidadaulo ti City Environment and Natural Resources Office iti siudad a ti programa ket mangipangpangruna iti panangpaimbag ti biodiversity ken food security iti siudad.
Naamoan a ti kalamansi seedling ti maibunong gapu ta nalaka daytoy a padakkelen ken addo a maipaayna kas ti panagluto ken panagaramid iti inumen.
Malaksid iti daytoy ket makatulong pay ti kalamansi iti biodiversity babaen ti panang-ayo dagiti nagduduma nga insekto a makatulong iti panagbiag dagiti mula.
Dagiti seedlings ket addaan iti 2 agingga 3 feet ti kadakkel ken nairanta nga alisto a tumubo nangruna ita a panawen ti tudo.
Mainaig iti daytoy, maipatungpal ti distribusion babaen iti koordinasion ti Association of Barangay Captains (ABC).
Nupay kasta, mabalin pay nga ag-request dagiti residente babaen kadagiti barangay officials tapno makaawat iti seedlings.
Kabayatanna, inbatad ni Ms. Pascual a gutigoten ti programa dagiti umili nga agmula iti fruit-bearing ken forest trees iti aglawlawda, kas paset ti panangpabileg iti kinatalged ti taraon ken panangsalaknib iti kinapintas ti aglawlaw iti suidad.
