LAOAG CITY – Indasar ti Sangguniang Panlungsod iti siudad ti Laoag ti joint committee report ti Committee on Ways and Means, Committee on Human Rights ken Committee on Public Ethics and Accountability mainaig iti isyu ti bidding ken pannakagatang ti 80 a lugan a maibunong kadagiti baragay ditoy siudad ti Laoag.
Nailanad iti report dagiti surat ni Faustino Tungpalan Jr., Sales Supervisor ti Northpoint Alliance Motors Corporation ken ti sungbat ti Bids and Awards Committee nga inpaay ni Laoag City Mayor James Bryan Alcid.
Segun ken ni Konsehal Conrado Respicio, naipaima iti komite ti isyu iti Commission on Audit (COA) a nangibaga a masapul a suroten dagiti probision ti procurement law ken mabalin laeng a mangidaulo iti post-audit kalpasan a maipasa amin a kasapulan a dokumento.
Naipaima met ti kaso iti Department of the Interior and Local Government (DILG) a naammoan a saan a mabalin a mangted ti opinyon iti isyu gapu ta daytoy ket mabalin a justifiable issue wenno banag a masapul a maipatungpal iti umiso a forum.
Inrekomendarna a maipaay ti kaso iti Government Procurement Policy Board (GPPB) para iti pagannurotan.
Kabayatanna, nupay ti pannakapaima ti isyu iti Bureau of Local Government Finance ken Government Procurement Policy Board (GPPB), namnamaen ti komite dagiti opisial a komento ken rekomendasion manipud kadagitoy nga ahensia.
Iti rekomendasion ti joint committee, inrekomendarda a dagiti nairaman a partido ket sumurot kadagiti umiso a remedio a naipaay iti procurement law ken makitinnulong kadagiti amin a masapul nga opisina iti panangidaulo ti Commission on Audit (COA) iti post-audit ti proseso ti panagatang.
Kabayatanna, kalpasan ti pannakaidasar ti report, inyuswat ti komite ti pannakaadaptar ken pannakaaprobarna daytoy iti konseho.
