Balligi a naisayangkat ti BOMBO RADYO PHILIPPINES ti Dugong BOMBO 2026: “A Little Pain, A Life to Gain,” iti nationwide blood donation drive a nagbinnuligan iti Bombo Radyo Philippines Foundation, Inc. ken ti Philippine Red Cross.
Daytoy ket naggigiddan a naisayangkat idi kalman, Nobiembre 14, 2026 iti intero a pagilian, no sadinno a nakaurnong ti Dugong Bombo iti pakabuklan a 1,964,250 cubic centimeters (cc) ti dara, a katukad ti agarup 1,964 a litro, 518 a gallon, wenno dandani 10 a drums ti dara, manipud iti pakabuklan a 4,365 successful blood donors iti intero a pagillian.
Ipaay ti Bombo Radyo Philippines ti naimpaposwan a panagyaman para kadagiti amin a nagballigi a nagidonar ti dara, pakairamanan dagiti nagrehistro ngem saan a napalubusan a nagidonar gapu iti medical screening requirements.
Pagyamanan pay dagiti partners, local government units, civic ken community organizations, volunteers, ken nagduduma a grupo iti suporta nga inpaay da para iti panagballigi ti DUGONG BOMBO!
Ti agarup 10 a drum ti dara a nakolektar ket makatulong iti nayun a suplay ti dara kadagiti blood banks, kangrunaan na ket agtultuloy a kasapulan para iti BLOOD TRANSFUSIONS ken emergency medical needs.
Daytoy a nailian a panagregget ket makatulong tapno siguradoen nga ad-adu a pasiente ti makagun-od iti access ti dara a mabalin a mangisalakan ti biag iti panawen a kasapulan unay daytoy.
Nalablabes pay ngem blood donation drive, ibagbagi ti DUGONG BOMBO ti espiritu ti pannakipagrikna, kinaparabur, ken ti makunkuna a “bayanihan”.
Iti tunggal panagdonar ti dara ket mangipaay ti namnama ken sabali pay nga oportunidad a mangisalakan iti biag.
Dagiti nagballigi a nagidonar ti dara ket nakaawat ti naisangsangayan a nadesenio a Dugong Bombo tshirts, napudot a taraon, bitamina, merienda ken mainum.
Kadagit amin a nagidonar, nakipaset, nagboluntario, ken nangsuporta iti kampania, AGYAMAN KAMI UNAY ti naimballigian a Dugong BOMBO 2026!
“DUGONG BOMBO 2026: A LITTLE PAIN, A LIFE TO GAIN”.
BASTA RADYO… BOMBO!
