LAOAG CITY – Sinaggaysa ni Sangguniang Panlalawigan Member Hanson Chua nga inlawlawag dagiti rakurak ti Bids and Awards Committee ken ni Laoag City Mayor James Bryan Alcid mainaig iti pannakadiskualipikar ti kompaniana iti bidding process iti panaggatang ti 80 a behikulo ti City Government.
Dimmawat ti panagpadispensar ni Bokal Chua para ken ni Mr. Faustino Tungpalan, Sales Supervisor ti NAMCO North Alliance Corporation a kompaniana gapu ta arig limmabes isuna iti panangipatulod ti surat kadagiti sumagmamano nga opisial ti City Government.
Segun kenkuana, apaman a naammoanna ti resulta iti bidding process ket awanen ti gagarna a mangipasa daytoy a nangipasa ti motion for reconsideration nga inbilinna ken ni Tungpalan.
Inbatadna nga insubmitirda ti general information sheet gapu ta awan met dagiti banag nga ilemlemmengda.
Inlawlawagna a saanna a kukwestionaren ti nagbalin a desision ti Bids and Awards Committee a diskualipikaren ti kompaniada iti bidding process.
Nupay kasta, kalikagumna nga iberipikar ti legal interpretation maipanggep iti bileg ti Sangguniang Panlalawigan.
Maipalagip nga agrekreklamo ti kompania ni Bokal Chua kalpasan a saan a nangabak iti bidding process iti panaggatang ti 80 nga FB Van a behikulo ti City Government a maibunong kadagiti barangay ditoy siudad ti Laoag.
Immuna iti daytoy, basar iti Bids and Awards Committee, nadiskualipikar ti NAMCO North Alliance Corporation iti technical eligibility basar iti sumagmamano a grounds kas ti saan a panangideklarar ti nasao a korporasion iti pakabuklan a listaan dagiti owner ken shareholders ti NAMCO kas nakailanad iti Section 81 ti Republic Act No. 12009 ken dadduma pay.
