LAOAG CITY – Inpasingked ni Engr. Randy Nicolas ti Local Disaster Risk Reduction Management Officer II ti gobierno probinsial, nakasagana latta dagiti heavy equipment ken dagiti search and rescue retrieval equipment no bilang pumigsa ken kumaro ti situasion gubuay iti iduduprak ti Bagyo Enteng.
Inlawlawagna nga iti baet a saan pay a marikna ti epekto ti Bagyo Enteng ditoy probinsia ket addan ti pakdaarda kadagiti mangngalap babaen iti Philippine Coast Guard a saanen a mapan agkalap tapno maliklikan ti saan a napintas a mapasamak kadakuada nangruna no kellaat a dumakkel ti dalluyong iti kabaybayan.
Inbatadna nga adda ti koordinasionda iti Department of Public Works and Highways a tumulong kadagiti lugar a makapasar ti panagreggaay ti daga nangruna iti ili ti Pagudpud ken ditoy siudad ti Laoag.
Mainaig iti daytoy, inpakaammo ni Engr. Nicolas a maibasar iti impormasionda manipud kadagiti nagduduma a City ken Municipal Disaster Risk Reduction and Management Offices nga awan pay ti nakaro a napasamak kadagiti lugarda.
Maipalagip a sinuspenso dagus ni Ilocos Norte Gov. Matthew Marcos Manotoc ti amin a klase iti pampubliko ken pribado a pagadalan pakairamanan kadagiti government offices gapu iti Bagyo Enteng.
Malaksid iti daytoy, nasuspenso metten dagiti domestic flight iti Laoag International Airport.
Kabayatanna, iti agdama ket saan pay a marikna ti napigsa nga angin ken tudo ditoy Ilocos Norte iti baet iti pannakaibayog iti pagsenyalan numero dos ditoy probinsia gapu iti iduduprak ti Bagyo Enteng.
