LAOAG CITY – Inpakaammo ni Atty. Chrito Malicad, ti mangidadaulo ti City Tourism Office ditoy ciudad ti Laoag a pinalagipan da dagiti tricycle driver a saan nga agsingir iti nangatngato ngem iti naituding a plete wenno agbalin dagitoy a “tourist friendly” kadagiti bisita nga adda ditoy ciudad para iti National Science and Technology Week 2025.
Segun kenni Malicad, adda iti panagtalek da kadagiti tricycle driver gapu ta ammo da nga adda iti sursuruten a pagalagadan iti panagsingir dagitoy iti plete.
Kunana a kanayon a maipalpalagip kadagiti tricycle driver ditoy ciudad ti Laoag a saan da a gundawayan ti agsingir iti nalabes a plete no adda iti dadakkel nga aktibidad ditoy ciudad.
Inbatad na a babaen ti panagbalin a “tourist-friendy” dagiti tricycle driver ket saan a maibabain ditoy ciudad, ken ti sibubukel nga Ilocos Norte.
Kabayatanna, kuna ni Malicad a kadagitoy a gundaway ket awan pay iti aniaman a report mainaig iti nalabes a panagsingir ti plete dagiti tricycle driver ditoy ciudad ti Laoag.
Maipalagip a manarimaan iti pannakaisayangkat iti National Science and Technology Week 2025 ditoy ciudad babaen ti pannakipartisipar dagiti delegado manipud kadagiti nagduduma a lugar iti pagilian no sadinno a ditoy a maimatangan dagiti nagduduma a teknolohia ken partuat dagiti Pilipino.
