LAOAG CITY – Nagpanawagan ni Atty. Gerald Gallardo, provincial director ti Department of Interior and Local Government ti pannakikaysa dagiti umili ken dagiti amin a Local Government Units iti pannakatagiben ti kinadalus ti aglawlaw.
Daytoy ket kalpasan a naruay a basura ti naukkon iti insayangkat da a “clean-up drive” kas paset ti panagsagsagana ti probinsia iti Palarong Pambansa.
Naammoan nga umabot iti 80.6 a kilo ti plastic a botelia, 15.5 a kilo ti plastic wrappers, 30.5 a kilo a mabuong a botelia, tallo a kilo nga “special waste”, 17.9 a kilo iti nagango a bulbulong ken 214.5 a kilo a “residual wastes” kas iti “diaper, sanitary napkin, CD, DVD ken dadduma pay.
Mainaig iti daytoy, nagtipon a ragsak ken liday ti narikna ni Mr. Joegie Jimenez a nangibagi iti Provincial Government of Ilocos Norte kas pollution control officer iti pannakaisayangkat ti nasao nga aktibidad.
Segun kenkuana, naragsakan gapu ta umabot iti 375 dagiti nakipaset iti naiyuswat nga aktibidad manipud iti nagduduma nga ahensia ti gobierno kas iti Department of Education, DILG, Phil. National Police, Phil. Coast Guard, 8th Marine Battalion Landing Team ti Phil. Marines, Dept. of Public Works and Highways manipud iti District 1 ken District 2, Bureau of Fisheries and Aquatic Resources, Parole and Probation Office, Phil. Red Cross, Phil. Drug Enforcement Agency, Ilocos Norte Provincial Jail, TESDA, CENRO, PGIN pakairamanan ti sumagmamano a barangay ti siudad ti Laoag kas iti Brgy. 5, 10, 7-B, 11 ken 12.
Kunana a maladingitan ta adu pay laeng dagiti umili a saanda nga ammo ti umiso a panagibelleng ti basura.
Inbatadna a masapul ti naan-anay a panangpalagip kadagiti umili babaen iti tulong dagiti brgy. officials ken nasken a maipatungpal dagiti ordinansa tapno madisiplinaan ti siasinno man nga aglabsing.
