LAOAG CITY – Namnamaen ti Road Clearing Operation Team ditoy ciudad ti Laoag nga idadauloan ni Mr. Anthony Agcaoili a napintas iti agbalin a resulta iti operasyon da kadagiti kalsada.
Daytoy ket iti laksid a nakagun-oden iti 90 a porsyento nga iskor ditoy ciudad iti napalabas a resulta ti clearing operation itay napan a tawen.
Segun kenni Agcaoili, saan nga imposible a magun-od da iti 100 a porsyento aglalo no adda iti kooperasyon ti tunggal maysa.
Maipalagip a naisayangkat ti road clearing operation para iti pannakadalos dagiti secondary road ditoy ciudad.
Naamoan a sumagmamano kadagiti kalsada a naisayangkatan ti nasao nga operasyon ket dagiti kangrunaan a problema dagiti motorista ken dagiti umili.
Agarup 80 a motorista iti naikkan ti ticket kabayat iti road clearing operation ken iti pannakaikkat dagiti mula ken signages iti igid ti kalsada a maibilang nga obstruction.
