LAOAG CITY – Inrakurak ni Department of the Interior and Local Government Secretary Jonvic Remulla a manarimaanen ti panang-trace ti ahensiada dagiti nadakamat a nagan uray awan pay ti arrest warrants kontra kadagitoy.
Segun kenkuana, dua kadagiti maipagarup a co-perpetrators ni dati a Presidente Rodrigo Duterte nga innaganan ti International Criminal Court (ICC) ti adda iti sabalin a pagilian.
Inbatadna a ti dua a mapagat-atapan a co-perpetrators ni Duterte ket maipagarup nga adda idiay Estados Unidos.
Kunana nga al-alaendan ti amin a rekord maipanggep iti daytoy ken manamnama a maala ita a lawas.
Basar iti naiparuk-at a dokumento ti international tribunal, binigbig ti International Criminal Court prosecutor dagiti co-perpetrators ni Duterte nga isuda Senador Ronald “Bato” dela Rosa, Senador Christopher Lawrence “Bong” Go, Vitaliano Aguirre II, Vicente Danao, Camilo Cascolan a natayen, Oscar Albayalde, Dante Gierran ken Isidro Lapeña.
