LAOAG CITY – Inrakurak ti Commission on Audit (COA) nga agpila da kadagiti kaso ita a bolan mainaig kadagiti maipagarop a “ghost” flood-control projects.
Karaman kadagiti mabalin a makasoan ket ti sumagmamano nga opisyal ti Department of Public Works and Highways (DPWH) ken dagiti pribado a kontratista ti gobierno.
Iti panagdengngeg iti Senado, inlawlawag ni Commission on Audit Auditor Tracy Ann Sunico a malmalpasen ti isaysayangkat da a fraud audit kontra kadagiti kompanya a nakaala kadagiti maipagarop a mapagduduwaan a flood control project.
Sungbat daytoy ni Sunico iti saludsud ni Senador Ronald “Bato” Dela Rosa iti Commission on Audit no apay a saan a dagus a na-flag dagiti proyekto sakbay a nabayadan no sadinno a kunana na pay a nangiparuk-aten ti “notice of disallowance” ti komisyon kontra kadagiti kumpanya a saan a nangisumitir ti disbursement vouchers, maysa a pammaneknek ti usto a pannakausar ti pondo.
Dinakamat na pay nga ado dagiti kompanya iti Bulacan ti napaay a nangisumitir ti nasao a dokumento ken mabalin a makasoan dagitoy.
