LAOAG CITY – Impasingked ti maysa nga auditor ti estado a saan a regular ti panangusar ti Office of the Vice President (OVP) iti P375 million confidential funds idi 2023 gapu ta saan da a sinurot dagiti naipasdek a pagannurotan.
Kabayatan ti maika-15 nga aldaw ti impeachment trial ni Bise Presidente Sara Duterte idi Mierkoles, kinuna ni Commission on Audit (COA) Intelligence and Confidential Funds Audit Office auditor Xylene del Campo a saan nga umdas dagiti dokumento nga insubmitir ti OVP tapno mapaneknekan ti panaggasto ti confidential funds.
Karaman ditoy ti panagbayad iti gunggona, a kuna ni Del Campo nga awanan iti umdas a dokumentasion a mangpaneknek iti resulta ti panaggastos ti confidential funds.
Mainaig iti daytoy, awan pay ti inpaay a kanayonan a dokumento a mangpaneknek iti pannakagatang ti sumagmamano a suplay, medical ken food aid.
Adda pay nakita ti COA nga iregularidad iti pannakaisubli dagiti gastos, agraman dagiti surveillance expenses.
Segun ken ni Del Campo, saan a mabalin nga usaren ti confidential funds para iti reimbursement gapu ta aglabsing daytoy iti Joint Circular No.2015-01 a pagalagadan iti panagusar ti confidential ken intelligence funds.
