LAOAG CITY – Inbatad ni PMaj Antonio Marzan Jr., ti pannakangiwat ti Ilocos Norte Police Provincial Office (INPPO), nga addan ti panangibilin da kadagiti pasdek negosio ditoy probinsia nga agisumitir ti kopia ti business permit ken sertipikasyon da a mangipaneknek nga accredited wenno adda pammalubos nga aglako da kadagiti paputok.

Segun kenkuana, nangrugi dan nga agawat iti business permit ken sertipikasyon kadagiti pasdek negosio a mangipaneknek a dagitoy ket lehitimo ken sumursurot ti pagannurotan iti panaglako da kadagiti paputok kabayatan nga umas-asideg ti selebrasyon ti paskua ken baro a tawen.

Inpetteng na a naiget ti panangipawil da ti panaglako kadagiti paputok babaen ti online transactions kas ti social media ken sabali pay a wagas iti online, ken dagiti awanan ti naan-anay a permit nga aglako iti paputok.

Iti agdama, inpakaammo ni Marzan nga awan pay ti nairekord da a naglabsing kadagiti pagannurotan mainaig iti panaglako ti paputok.

Kabayatanna, inbatad ni PMaj. Marzan nga aktibo ken agtultuloy ti panangisayangkat ti Ilocos Norte Police Provincial Office (INPPO) iti programa da nga Oplan Bandilio no sadinno nga agturong da kadagiti pasdek a pagdudupudupan dagiti tattao kas ti merkado publiko, dadakkel a mall, terminal ti pampubliko a lugan, ken dadduma pay.

Kagiddan iti daytoy, nagpalagip ti opisyal iti publiko a sumurot kadagiti pagannurotan ken binalakadan na dagitoy iti naan-anay a panagan-annad ken panagridam tapno maliklikan ti panagbalin a biktima ti panagsipdot wenno ti panagtakaw.