LAOAG CITY – Maladingitan ni Dr. Robert Salvador, Coach ti Football Team ti Ilocos Norte iti pannakaipatungpal ti panagbayad ti 2,500 a pisos iti kada oras a panagabang iti football field iti Ferdinand Edralin Marcos Stadium ditoy siudad ti Laoag.
Segun kenkuana, nadagsen kadakuada nangruna kadagiti maseknan nga estudiante a kasapulan a dumalan iti panagsanay iti football field.
Inbatadna a kalikagumna a malawlawagan daytoy a pagannurutan ditoy probinsia gapu ta nadagsen nga ibaklayda ti pagbayad iti nasao a gatad.
Inlawlawagna a nupay adda dagiti dadduma pay a pangisaysayangkatanda ti training kas iti Bacarra Central Elementary School ken Mariano Marcos State University pakairamanan dagiti private properties ngem limitado laeng.
Kunana nga iti kallabes ket adda ti panagkiddawda iti pannakausar ti football field iti Ferdinand Edralin Marcos Stadium no sadinno adda met ti panangaprobar ti Provincial Government of Ilocos Norte.
Innayonna nga adda metten ti panangipakaammona kadagiti maseknan nga estudiante ditoy siudad ti Laoag maipanggep iti nasao a banag.
