LAOAG CITY – Nagballaag ti Bureau of Fisheries and Aquatic Resources iti Eastern Visayas iti publiko a saan a mangan, agkolektar ken aglako ti amin a klase ti shellfish iti coastal waters idiay Samar.
Daytoy ket kalpasan ti panagtaud ti toxic microorganism a mangitunda ti red tide.
Inrakurak ti Bureau of Fisheries and Aquatic Resources, maysa a toxic microorganism a mangitunda ti paralytic shellfish poisoning iti coastal waters ti Eastern Samar.
Karaman kadagiti naapektaran a lugar ti Irong-Irong Bay idiay Catbalogan City, iti Samar ken Matarinao Bay idiay General MacArthur, Quinapondan, Hernani ken Salcedo idiay Eastern Samar.
Nangiparuk-at met ti Local Advisory ti Eastern Samar Provincial Fishery Office iti ili ti Guiuan a nagpakdaar maipapan iti kaadda ti red tide toxin iti coastal waters ti Guiuan.
Inabisoan ti Bureau of Fisheries and Aquatic Resources ti publiko a saan a mangan ken aglako ti aniaman a klase ti shellfish, Acetes ken dadduma pay kadagiti naapektaran a lugar.
Natalged met nga ipauneg ti pusit, hipon ken alimasag laketdi naagusan a naimbag ken naikkat dagiti adda iti uneg dagitoy sakbay a lutoen.
