LAOAG CITY – Temporario a sinuspenso ti Manila Police District (MPD) ti naiget a panangipatungpal ti ordinansa a gagem a mamulta dagiti makita a nakauyos wenno awan ti suotna a bado iti pangngato kadagiti kalsada.
Daytoy ket kalpasan a naaddaan ti nagduduma a sentimiento ti publiko mainaig iti implementasion daytoy a nagbalin nga ‘anti-poor.’
Basar iti inparuk-at a pammilin nga epektibo idi Abril 11, nabilin ti amin nga operating units ken kameng a karaman iti Oplan Galugad ken dadduma pay nga anti-criminality operations a liklikan ti panangiwayat kadagiti tignay a mangipakpakita iti panangipataw ti pannusa.
Naammoan nga imbes a mangiyisyu dagiti otoridad kadagiti multa, nabilin dagitoy a mangipaay pay laeng ti warning ken mangisayangkat ti information drives para kadagiti maipatpatungpal nga ordinansa ken community standards.
Kunana a daytoy nga addang ket kalikagumna nga ad-adda pay a paigetan dagiti makatao a panangipatungpal kadagiti pagalagadan para iti panagpatalinaed ti public order.
Kabayatanna, inlawlawag ti Manila Police District nga iti baet kadagiti baro a pammilin, naiget latta nga ipatungpal dagiti operasion para kadagiti aglablabsing kadagiti maipatpatungpal nga ordinansa iti curfew hours ken panaginum ti arak kadagiti kalsada.
