Kinumpiramaran ti dati a bodyguard-driver ni dati a Presidente Rodrigo Roa Duterte a “Superman” ti code name ti dati a mayor ti siudad ti Davao.
Inbatad ti retirado a polis a ni Sanson Buenaventura ket mapapati a panangkumpirama dagiti inrakurak ti sumagmamano a personalidad kas kadagiti dati a kameng ti Davao Death Squad (DDS).
Mainaig iti daytoy, ni Buenaventura, nagbalin a bodyguard ken driver ni Duterte manipud 1988 agingga 2008, ket sinaludsod ni Batangas 2nd District Rep. Gerville “Jinky Bitrics” Luistro iti panagtabuno na iti Quad Committee hearing ti kamara de Representantes idi Huebes.
Kinuna ni Buenaventura nga adda dagiti grupo iti siudad ti Davao nga aw-awagan da ni Duterte babaen iti code name a Superman.
Namin-adu a daras a nadakamat ti nagan ni Buenaventura kadagiti testimonia dagiti nagduduma a tattao a nagsao mainaig iti Davao Death Squad.
Inbatad ti Self-confessed Davao Death Squad hitman Arturo Lascañas, iti 2017 affidavit-na, kinunana a dakkel ti akem ni Buenaventura iti Davao Death Squad ken isuna iti responsible iti logistics ken finance ken nagserbi a liaison tapno mangidanon kadagiti bilin ni Duterte.
Kabayatanna, dinakamat met ni dati a Philippine Charity Sweepstakes Office General Manager Royina Garma a ni Buenaventura ti mapapati a naikkan ti P20,000 a gunggona kadagiti station commanders iti tunggal papatayenda a drug suspect.
