LAOAG CITY – Agkiddaw ti nayun nga 4-bilyon a pondo ti Commission on Elections (COMELEC) no maitatan intono Nobyembre 2026 ti Barangay at Sangguniang Kabataan Elections (BSKE), tapno adda ti usaren para kadagiti baro a botante.
Segun ken ni Commission on Election Chairman George Erwin Garcia, nagtalinaed a buo ti agdama a 11-bilyon a budget para iti Barangay at Sangguniang Kabataan Elections ken otomatiko a maikabil daytoy iti sumaruno a tawen no maitantan ti eleksyon manipod Disyembre 1 ti agdama a tawen.
Nupay kasta, kuna ni Garcia a kasapulan ti nayun a pondo para iti ad-ado a balota, presinto, mangisursuro ken election paraphernalia gapu iti manamnama a panagado ti bilang dagiti botante.
Iti agdama, adda ti 2.8 milyon ti baro a registrants manipod iti 10 nga aldaw a voters’ registration drive, ti kaadoan a bilang iti pakasaritaan ti poll body ken naartapan na iti target a 1.5 milyon.
Inbatad ni Garcia a kaadoan kadagiti baro a botante ket dagiti agtutubo, mangipaneknek a ngumatngato ti “political maturity” dagiti Pilipino.
Innayon na a no maitantan ti eleksyon ket plano ti poll body ti mangiyuswat ti nayun a registration manipod Oktubre 2025 agingga iti Hulyo 2026 a mabalin a mangitunda ti nayun nga 4-milyon a baro a registrants.
Mainaig iti daytoy, inpasigurado ti poll body a nakasaganan dagiti materyales para iti eleksyon no matuloy iti orihinal a petsa tapno maliklikan ti pannakaitantan ti preparasyon.
