LAOAG CITY – Inlawlawag ti pannakangiwat ti Commission on Elections (Comelec) a saan nga inbaga iti desisyon ti First Division nga awan ti pannusa iti saan a panagipila ti income tax return (ITR).
Daytoy ket mainaig iti panangibasura ti dibisyon iti tallo a disqualification cases kontra ken ni Presidential Aspirant Ferdinand “Bongbong” Marcos Jr.
Basar iti desisyon ti nasao a dibisyon, naibag a ti pannakapaay ni Marcos a nagpila ti income tax returns idi 1982 agingga iti 1985 ket saan a maysa a krimen a maibilang a “moral turpitude,” a maysa kadagiti pagibasaran tapno madiskwalipikar ti maysa a kandidato.
Segun ken ni Comelec spokesperson James Jimenez, adda dagiti rakurak iti desisyon a saan a nakompleto iti panangiparuk-at ti sabali a tao isut gapuna a rimuar a sabalin ti pakaipapanan na kangrunaan na ti isyu maipanggep iti pannusa iti saan a panagpila ti ITR.
Inpetteng ni Jimenez a saan nga usto nga ibaga nga inrakurak ti Comelec nga awan ti pannusa ti saan a panagpila ti ITR isut gapuna nga okey laeng a saan nga agpila ti siasinno man.
Innayon na a no adalen a naimbag ket dinakamat pay ti poll body ti linteg kontra iti saan a pangipila ti ITR.
Immun-una iti daytoy, iti 41 a pinanid a desisyon a pinonente ni Commissioner Aimee Ferolino, inbasura da ti disqualification case kontra ken ni Marcos nga agpaidasig a para presidente iti May 2022 elections gapu ta nakurang ti merito na.
