LAOAG CITY – Kasapulan ti Commission on Elections (Comelec) ti nayun nga agarop P3 bilyon no matuloy ti pannakaisayangkat ti Barangay at Sangguniang Kabataan Elections (BSKE) intono Disyembre ita a tawen, no saan nga ipalubos ti Korte Suprema ti pannakaitantan ti eleksyon intono 2026.
Inrakurak daytoy ni Commission on Elections Chairman George Garcia iti deliberasyon ti House Committee on Appropriations para iti proposed P11.5 bilyon a budget ti komisyon para iti 2026, kalpasan a nasaludsud kenkuana no nagtalinaed a nakasagana ti ahensya iti pannakaisayangkat ti eleksyon ita a tawen no ideklarar ti Korte Suprema a mailabsing iti linteg ti pannakaitantan daytoy.
Inpetteng ni Garcia nga adda laeng ti nakailatang a P10 bilyon a pondo ti Commission on Elections para iti pannakaisayangkat ti eleksyon, a naudi a naiyuswat idi Oktubre 2023.
Segun ken ni Garcia, umabot iti P9 bilyon ti budget deficit para iti pannakaisayangkat ti eleksyon no maituloy intono Nobyembre 2026, maiyataday iti linteg a pinirmaan ni Presidente Ferdinand Marcos Jr., nga agdama met a kweskwestyunaran ti Korte Suprema.
