LAOAG CITY – Makibinnulig ti Commission on Elections (Comelec) kadagiti mangimatmaton kadagiti online platforms para iti naparpardas a panangpaksiat kadagiti peke a damag, di umiso nga impormasion ken disinformation iti umay a campaign period para iti 2025 midterm elections.
Kabayatan ti hearing iti naisingasing ti Senado seknan iti budget ti Commission on Elections para iti tawen 2025, inadmitir ni Commission on Elections Chairperson George Garcia nga awan pay ti regulasionda iti panagusar iti online platforms, pakairamanan ti deepfakes ken artificial intelligence (AI).
Kinuna ni Garcia, a saanda nga iparit ti panagusar iti artificial intelligence gapu ta nasayaat met daytoy no mausar a nasayaat.
Kuna na a ti liklikanda ket di umiso nga impormasion, disinformation ken peke a damag, isu a babaen kadagiti inruarda a pagannurotan, makikoordinarda kadagiti nagduduma nga online platforms tapno awan ti palso nga impormasion a maiwaras iti umay nga eleksyon.
Makitinnulong pay ti ahensia iti Department of Information and Communications Technology (DICT), ken iti Philippine National Police (PNP) para iti natalged kampania.
Impasigurado na a madusa dagiti maduktalan nga agiwarwaras iti misinformation, disinformation ken fake news apaman ti kampania ken election 2025.
