LAOAG CITY – Inrakurak ni Atty. Joel Gines, ti Commission on Elections Supervisor ditoy probinsya a makumikum da iti isaysayangkat da a preparasyon para iti Midterm Elections.
Kuna na a sipud idi Enero 12 ita a tawen a panangrugi ti Election period ket adon dagiti pakakumikuman da, karaman ditoy ti naiget a pannakitinnulong da iti maisaysayangkat nga election checkpoint kadwa da ti Philippine Nationa Police.
Kuna na a babaen iti daytoy ket masigurado nga agtalinaed a natalna ti probinsya kabayatan nga umas-asideg ti kaaldawan ti kaaldawan ti panagpipili.
Maragsakan met a nangipakaammo ni Gines a sipud nangrugi ti election period ket awan pay ti natiliwan wenno naalaan da ti paltog wenno aniaman a kontrabando a mailabsing iti election gun ban.
Inpakaammo na pay a ti sumaruno a tutukan da ket ti idadalan ti training dagiti agserbi kas Board of Election Inspectors (BEIs) manipod iti Department of Education.
Mainaig iti daytoy, nagpalagip manen ni Gines nga apaman a mangrugi ti kampanya ket masapol a siguradwen dagiti kandidato nga usto ti kadakkel dagiti posters wenno tarpaulin da, ken dagiti laeng maipalubos a lugar ti pagikabilan da.
Segun ken ni Gines, dagiti Pamphlet, Leaflet, Stickers ken dadduma pay ket 8.5” x 14” ti size na idinto a ti streamer ket mabalin ti 3ft x 8ft.
Nupay kasta, inbatad ni Gines a dagiti streamers ket masapol a maikabil lima nga aldaw sakbay ti panangiyuswat ti rally ken maikkat daytoy kalpasan ti 24 nga oras.
Nagballaag ti opisyal a no adda dagiti saan a sumurot iti daytoy a pagalagadan ket ipatungpal da ti “Operation Baklas”.
