LAOAG CITY – Nagpalagip manen ni Atty. Leonila Fortuna, City Election Officer ditoy Laoag kadagiti lokal a kandidato iti Mayo 2022 Elections iti panangrugin ti panagkampanya dagitoy.
Karaman kadagiti rumbeng a suruten dagiti kandidato ket ti size ti campaign poster a 2×3 ken maipan kadagiti umno a lokasyon wenno common poster areas; no adda ti motorcade ket maiparit ti stop over wenno panagsardeng.
Malaksid iti daytoy, maiparit pa ti physical contact kas iti panagalamano, panaginnarakup, panagselfie ken maiparit ti panangipaay ti makan, mainom ken kagamitan kabayatan ti panagkampanya.
Segun kenni Fortuna, masapol a suruten dagiti kandidato dagiti nakailanad iti resolusyon ti Commission on Elections (Comelec).
Mainaig iti daytoy, kinumpirmaran ni Fortuna nga adda dagiti nakita da a dadakkel a campaign posters ngem ada kadagiti pribado a sanikua wenno lote.
Inpetteng na a saan da a mabalin a garawen agpapan ita dagiti saan nga umno ti size na a campaign posters gapo iti TRO nga inisyu ti Korte Suprema.
Nangrugi ita nga aldaw, Marso 25 agpatingga into Mayo 7 ti panagkampanya malaksid intono Huwebes ken Biyrnes Santo.
