LAOAG CITY – Indauloan ni Commission on Elections Chairman George Erwin Garcia ti online voting and counting system training idiay South Korea ita nga aldaw.
Kadua ni Chairman Garcia dagiti sumagmamano nga opisial ti poll body ken training team.
Gagem daytoy tapno mabayabayan dagiti mangimaton iti eleksion iti nasao lugar nangruna ket sabali a makina ti usaren para iti 2025 midterm elections.
Naiyuswat ti event idiay Busan, South Korea no sadino naggapu mismo dagiti pasilidad nga aramid ti Miru Systems nga isu ti agserbi kas service provider.
Inpasigurado met ni Garcia nga agtultuloy ti voters information drive agingga inton election period tapno maimpormaran dagiti botante maipanggep ti wagas iti panagbotos.
