LAOAG CITY – Inpasigurado ni Commission on Elections (COMELEC) Chairman George Erwin Garcia a pagsungbaten ti komision ti opisial dagiti barangay a karaman iti kellaat a panagadu ti registered ken transfered voters kadagiti lugar ti Cagayan de Oro ken Makati City.
Inbatadna a kasapulanen a lippasen ti nasao a banag a mapaspasamak iti panagsagsagana iti eleksion.
Kunana nga awan ti biddot iti panangiruar kadagiti barangay certificates gapu ta trabahoda daytoy nge no daytoy ket ar-aramidende para iti bukud nga interes ket saan a nainkalintegan.
Mainaig iti daytoy, mangiparuk-at met ti Law Department ti subpoena tapno agpalawag dagiti opisial dagiti barangay kadagiti nasao a lugar inton Lunes, Disiembre 2.
Kabayatanna, inpasigurado ni Commission on Elections Chairman George Erwin Garcia a tutukan daytoy ti komision ken mapagsungbat dagiti karaman iti daytoy.
Maipalagip a ngimmato iti 56,586 dagiti nag-reactivate, nag-transfer ken baro a nagrehistro a botante manipud idiay Makati City idinto nga idiay Cagayan de Oro ket dimmanon iti 8,218 dagiti nairekord a baro a botante.
Naammoan nga amin dagitoy a kaso ket adda ti pakainaiganna iti adu a panangiruar kadagiti barangay certificates kas pammaneknek iti pakabigbigan.
